ذكريات أبو إلياس: الحلقة الثالثة عشر | حــــاج فــــزلــــكــــة

• ألوووو.. 
ألو، مين..

• شو عميم، بطلت تعرف صوتي عالتفلون؟
اي والله بلا مؤاخذة مين معي؟

• عمي، انا حمزة.. شبنا، تبريت مني؟
لك أهلين، أهلين، ولك وين اللي بدو يجي يا عاطل، قوم حميل حالك وتعال لعندي..

• صعبة والله يا عميم.. انا بلبنان ، بس حبيت اتطمن عليك..
وقت سياحتك هلأ؟

• لو سياحة مين يا حجي.. الله عليك يا أبو إلياس. عمي، طمني عنك شو الأخبار اليوم؟
الأخبار متل ما عم تشوف لك ابني، الدمار دمار، والضرب موجود، والاعتقال على أبو جنب..

• الله يستر.. عمي، بدي اسألك سؤال عالماشي!
اي عم قول في من وراك مصلحة، هات لنشوف!

• من اربعين سنة لهلأ، ولبعد الثورة، سمعت شي بحدا انفصالي!
ليك ابني، حدا قلك معي شهادات الدنيا، حكيني متل الخلق..

• ههه، سمعت شي حدا بسوريا، حابب يستقل مثلا ويعمل دولة لحالو؟
هههه، اي انا.. بدي اعمل دولة وبدي حطك وزير

• لا والله يا عمي بجد عم احكي..
لك ابني، ما بدك تزوء؟
ما حلك تفهم انو النظام هو اللي زرع هالافكار هي.. النظام صرلو اربعين سنة عم يعمر ليهد هالمجتمع، وينشر عالافكار اللي عم تطلعو فيها..

• شو شايفك بلشت فيي بهادل!
اي بدك ياها، لك حكيتلك الف مرة، من يوم يومنا مافي فرق لا بالدين ولا بالطائفة.. بس بتعرف شو المشكلة لك ابني؟!

• هات لنشوف عميم، أتحفنا..
مشكلتكن انو لما بتجيكن شغلة ما بتعرفو فيها ما بتسألو، ولا بتدورو، عالسريع بتقول هي غلط..
حاج كل ما النظام زت كلمة تشتغلو فيها يمين ويسار..
واذا بدك بالمشرمحي، لا المسلمين رح يساووها دولة اسلامية.. ولا المسيحيين رح يساووها فاتيكان، لك ولا حتى الاكراد رح يعملوها ويساوو دولة

• اجيت عالوجع  والله يا حجي
اي لكن حاج تحكي شروي غروي، فهمو شو كان عم يصير، بعدين احكوا

• الله يطمنك يا حجي..
طيب ايمت جاي من سفرتك انت مطول؟

• يومين بكون عندك عميم، يومين..

يتبع…