ذكـريات أبـو إليـاس: الحلقة الرابعة عشر – أملنا كان، وصار

•لك الله يجعلو صباح الخير.. 

لك أهلاً أهلاً أهلاً، شو هالمفاجأة الحلوة هي!

• كيفك عميييم، لك يلعن روحو اللي ما بيتسمى شأد اشتأتلك. 

ههه، لك أهلين عمي حمزة أهلين، شو جابك انت، ما على أساس كنت بلبنان

• والله يا حجي اشتأت لكاسة المتة من دياتك، قلنا منجي منشربلنا شي كاسة عالماشي..

لك اي ما تكرم، سحاب هالكرسي وتعا حكيلي..

 • طول بالك عليي شوي أبو الياس، هيك عالحارك!

لك إي هيك، خلصني بلا ما تاكلك شي عكازة على قفاك، كنك حنيت..

• خلينا بلا ضرب هالمرة دخيل عينك.. ما ناقصنا

اي هات لنشوف، شو اخدك فجأة على لبنان، لك كيف فت وطلعت!!

• لا هي عمي خليها لبعدين، أما شو كنت عم ساوي، فهي قصة بدها إبريق متة، ما بس كاسة..

هات السكر من وراك، وحكيلي..

• والله يا عمي، اتصل فيي جورج ابن اخوك، بتعرف كنا نشتغل سوا وهيك..

أيوا أيوا.. اي..

• المهم حجي، كان في شوية دوا وأغراض من لبنان، فعملنا اللي علينا، واستفقدنا العالم اللي هنيك.. وهي رجعتنا..

لك روح الله محيي البطن اللي حملك، وكيف الوضع اللي هنيك طمني!!

• الله يعين هالعالم يا عمي.. الله يكون بعونهم

ليك ابني، سماع هالكلمتين منيح، بس ما تقول هاد عمك ابو الياس كبير وخرّف وبلش ينظر علينا على هالصبح..

• له يا عميم، الله يسامحك، انت الاصل والله، هات لنشوف..

شوف عمي، صرلكم مبلشين شي سنة وطبشة.. وما كان عندكن شي، وهلأ صار في جيش حر، وفي مجلس وطني وصار في كم بلد معكم..

• حلو هالحكي..

يعني بلشت الكفة تميل وبشكل كبير، الأمل كبر فيكم، وبهالثورة
الأمل بأنو نتحرر من هالظلم اللي كان موجود، والعالم كلها صارت تتفاعل، يعني متل ما بلشتو بأمل صغير، صار هلأ في عنا أمل كبير.. وقرب يتحقق

• بإذن الله يا عمي، بس والله راح كتير.. كتيير

اللي راح، الله يرحمو، وما مننساه، بس لازم نكفي الطريق..
شِه.. شو بدك ياهن يروحو عالفاضي لك عمي؟!
وهلأ بعد ما قرررربت..

• والله كلامك درر يا حجي، نهايتهم قربت، بس لسا بدها شوية صبر، وشغل.. وأمل..

يتبع…