ذكـريات أبـو إليـاس: الحلقة الخامسة عشر | حالة حب

• جنة جنة جنة.. والله يا وطنا..

شو ياا. مطروووب اليوم..

• أهلين بالعميم.. اي والله، ليش لاء

اي الله يهنيك يارب، فرحنا معك لنشوف

• عمي.. بدي اسألك أول..

قوم تحرك، حط ابريق الشاي، بعدين اسأل على كيفك..

• أبشر طااال عمرك، وهي أحلى أبريق شاي، لأحلى أبو الياس..

ولك زوء يا ولد.. هيك أبو الياس حاف!!
لا تكون خادم معي بالعسكرية وماني عرفان

• هلأ هيك!!

اي هات لنشوف، شو قصتك متل السكران اليوم؟
بسطنا معك..

• والله يا عمي.. ممم، كيف بدي قلك ياها..

احكي وخلصني.. حاج تمأمئ

• طيب .. حجي الحب بهالوقت غلطة؟

أيوا أيوا.. كيف يعني..

• الحب الحب، غلطة بهالوقت..

أكيد لا، الناس كلها صارت تحب بعضها أكتر من قبل.. وين المشكلة..

• ليك عمي، بالمشرمحي، شفت صبية مبارح، وعجبتني..

طيب.. وين المشكلة!

• شلون وين المشكلة.. ليش انا حاسس هلأ ما وقتها..!

ليك ابني.. حمزة.. سماع
بس ركز منيح، ما تاخد الحكي لطش متل عادتك

• حكي عمي.. كلي آذان صاغية 

هالثورة، خلت الناس تحب بعضها بجد، صار الجار يحب جارو، والأخ يرجع يحب أخو
وصار في الرفيق عن جد، والعالم تدافع عن بعضها لك حتى بدون ما تعرف بعض منيح

• اي…

اي مشان هيك يا ابني.. هالثورة علمتنا الحب على أصوله..

• وكيف هي؟

الثورة ما بس إسقاط نظام.. الثورة يا ابني الها بعد أنساني أكتر .. بتخلينا لما نحب، نحب عن جد..
وبالمختصر المفيد.. ما غلط تحب.. بس حب عن جد.. وبأخلاق الثورة..

• أيوا.. طيب عمي.. سماع هالقصة لكن.. 

يتبع…