بقلم نورا
—————–
اليوم كان ابدا ابدا مو طبيعي ساعتين عشتها بالقصاع كانت عبارة عن حرق قلب واعصاب وخيبة امل…وصلت مع رفقاتي شباب 3 عالكنيسة مطرح ما كان على اساس القداس تأخرنا 10 دقايق لانو كل المنطقة كانت مسكرة ومافي مكان نصف السيارة….
وصلنا لناح الكنيسة تقريبا قام لقينا ناس متجمعة كتير والشبيحة عم تركد وكانت بلشت العلقة انا بصراحة خفت مارح اكذب فقلت لرفقاتي الشباب انا رح وقف عالطرف التاني وفاتو الشباب بالمعمعة وانا بلش قلبي يغلي….اول شي كان الهتاف جاي من جوات الكنيسة كان ضعيف ومانو واضح بعدين ركضوا الكلاب وتجمعو قبال الكنيسة وبلشو يهتفوا لرئيسهن الساقط بألفاظ مقرفة وعيب تنذكر بالشارع حتى الناس قرفت وصارت تعيط عليهن انو عيب هالحكي في بنات….
اجو العناصر بلشو يمشونا نحنا الي واقفين على جنب وبلش يعيط العنصر يلاااا من هوون المدنين امشو منهون اخر انذار انتو اهلنا واخواتنا ما بدي أذيكون يلا من هون اجينا لنمشي بتعلق مرة تانية فبيركضو شبيحة اكتر لجوة…ا
لشي الغريب انو ناس كات واقفة بالشارع على اساس بس شتد الوضع ركضو على سياراتهن ومحلاتهن وحملو روسيات (اسلحة) وعصي….بعرف انو في كتير عواينية بس ما تخيلت انو حدا جدا طبيعي راكب سيارة فخمة يكون حاطط روسية حدو عالكرسي صرت اتخيل انو انا ممكن كون اعرف ناس متل هيك بس مو دريانة اي كمان ممكن هدول بيمشو بالشارع والي مابيعجبهن بيقوصو ما بتفرق معهن….
اعتقلو 3 شباب قدامي بعد ما هلكوهن ضرب انا هون نهرت بكا ما عاد قدرت كمل بس كل ما امشي خطوتين بدي فل قلبي ما يطاوعني وارجع وقف عالرصيف….حاول جمع كل الشجاعة الي عندي ياها تأصرخ انو خلللللللللللللللص حاج بئا تركونا نعيش ما اقدر ما قدرت احكي شي….هاد الحكي استمر تقريبا ساعة الا ربع بعدين اجا هاد العنصر نفسو صار يقلنا اخواتي امشو من هون يلا ما بدي اذي حدا يلا من هون اجا واحد تاني وراه صار يقول يلا نقلعو يلااا الي بدو ثورة يجي لعندي انا بعطيكن ثورة مين بدو ثورة يلا يلا نقلعو واذا بدي شوف حدا واقف بدي اعتقلو لا تخلوني فضي الروسية فيكن….من هالحكي مشينا لوصلنا قبل ساحة باب توما بشوي بينط شب من بين الناس بينادي تكبييييييييييييير الناس بتنصدم وانا كنت عم ابكي رديت عليه بس ما سمعني…بينط واحد تاني بيقول الشعب السوري ما بينذل بيردو وراه شي 10 بس ختفو هالعالم فجأة رحت دورت عليهن ما الهن اثر…..
مابعرف ليش خطر ببالي غياث مطر فرحت جبت ورد ورجعت لعند الامن ووزعت على كل عنصر وردة وماحكيت ولا كلمة… قام اجا واحد سألني ليش قلتلو مشان تعرف انو نحنا مناح ومابنستهل الي عم تعملو فينا….نصدم وانا ما عطيتو مجال يرد حملت حالي ومشيت لعند بيت باسل بس كمان كان في شبيحة هنيك وماخلوني فوت خلوني مر مرور الكرام بدون حتى ما اقدر اتطلع عالبيت او ضوي الشمعة الي كنت جايبتها لباسل….
ما كنت متوقعة انك قاهرهن لهلدرجة، عنجد جانين منك كتير !
