ذكريات أبو الياس | الحلقة التاسعة عشر – نخوة رجال

الله يسعد صباحك يا ابو الياس..

• لك وصباحك ان شالله.. شو شايفك جاييني اليوم قبل الشحادة وبنتا، شو قصك..

هيك عالباب بدي احكيلك شو قصتي..

• لك اي فوت تضرب، هلأ صار بدك عزيمة

هههه، بتمون عمي،، بتمون.. خدلنا طريق

• اي فووووت خلصني، مافي حدا، خالتك ام الياس نايمة، وبوجهك عالمطبخ كمان.. عملك فنجانين قهوة بين ما ارجعلك

أيوا أيوا.. انا الضيف عميم.. يعني انت لازم تعملنا القهوة..

• خلصني اشتغل وبلا كترة حكي..

بتؤمر أمر.. اي كم ابو الياس عنا؟!

• اي هات لنشوف.. شوفي اخبار، جبتك بهالوقت في من وراها شي؟!

اي والله يا عميم..
بتذكر الشب اللي جبنا لعندك من اسبوعين وكان متصاوب؟

• لك اي صحي، طمني كيف صار..

الحمدلله بخير.. مشي حالو وصار تمام التمام
بس في مشكلة

• خير اللهم اجعلو خير، شو المشكلة لك ابني!

هاد يا عمي بدنا نطالعو برات البلد لانو صار مطلوب، وبدنا حدا يأمنو عندو كم يوم..

• بركي بتقوم بتتحرك وبتجيبو لعندي متل ما الله خلقك، وعالحارك كمان

لك الله يبارك فيك يا حجي.. خلص لكن يومين وبكون عندك، بس بين ما نشوف كيف بدنا ندبر راسنا عالحواجز..

• والله يا حمزة عم تذكرني بأيام زمان..

الله حيووو ابو الياس.. هات لنشوف حكيلي عن ذكرياتك

• هي بزمانو يا عمي، كنا انا وتنين رفقاتي لاطين لدورية فرنسية بالغوطة، بالشام

اي..

• هني قربوا علينا.. بلشنا الضرب فيهم.. روحنا تنين منهم من اصل خمسة وواحد تصاوب، بس التنين البقية لحقوا حالهم، المهم واحد من رفقاتي تصاوب بكتفو اليمين، وما عاد نعرف وين بدنا نخدو
وفجأة لك ابني، ونحن ماشي بين البراري ما منلاقي غير وحدة كبيرة شوي بالعمر، وعلى هالحصان..

ايوا ايوا.. وبعدين

• والله طلعت اخت رجال.. رحنا لعندها وتخبينا، ولولا ستر الله ونخوتها هي واهل بيتها كنا رحنا بخبر كان..

وبعدين لك عمي؟

• اي شو وبعدين.. هي يا سيدي…

يتبع…

مجلة سورية بدا حرية