سامي
———-
اليوم بيمر 73 يوم على إعتقال صديقتي الغاليه (صانعة طيور السلام)
بعمري مافكرت اكتب أي شي عن حدا من أصدقائي المعتقلين،لأنو دايما كنت قول يلي صاير عالناس بالبلد بيصير عليهون،ومالنا أحسن من أحدى، وما لأنهون رفقاتي لازم ساويلهون طنه ورنه وقضيها بكي وندب عليهون.
بس جد ما قدرت ما إكتوب شي ولا إحكي عنها شي…لأنها هيه وإختها كانوا من أروع صبايا الشام.
إعتقلوهون بأواخر رمضان بـ 14/08/2012 ومر عليهون أول عيد وهمة بالمعتقل وعيد ميلادها، واليوم بيمر عليهون هيه وإختها تاني عيد وهنه بسجون البعث.
بقانون النظام البعثي بيقولوا بعد 60 يوم لازم يتحولوا عالمحكمه أكيد مو لأنهون إرهابيه، بس لأنهون كانوا بيحملوا جواتهون معنى الحريه والكرامه وبيجملوا بقلوبهون روح الإنسانيه.ه، واليوم متلهون متل كتار مرق عليهون أكتر من 73 نهار وهنه لسا بالسجن.
ما راح قول بعرف الإختين،أنا بعرف وحده بس،وحده منهون بشوف منها الشام وبتخليني ضل حس إنو الياسمين الشامي دايماً بألف خير،وإنو مع كل شي صار وراح يصير بس أكيد.
“بكرى أحلى”
بعمروا غروري ما سمحلي إتقبل فكرة إنو حدا بيحب الشام أكتر مني إلا وقت بتكون هيه فايته معي عالمنافسة.
مالها نشاطة فيسبوك،ولا عندها 100 لايك عالبوست لحتى تنشهر.
مابتطلع بتقول أنا ساويت وأنا عملت.
بتتحرك وبتشتغل عالساكت لأنها بتآمن أنو سوريا بتستاهل الواحد يشتغل أكتر ما يحكي وإنو الوقت يلي راح تضيعوا بالحكي،بيجوز يكون في عيله هون محتاجه دعم أو شباب هنيك محتاجين مسانده.
من فتره حكيوا شباب رفقاتهون إنو لازم ينعملون شي، وفعلا لاقينا صديق إلها مساوي حمله.
كانت جدا راقية لأنها فعلا بتعبر عنهون ،صانعة طيور السلام.
بس ليش “صانعة طيور السلام”
لأنو هالصبية الدمشقية كانت تصنع طيور الكركي من الورق و تكتب عليها اسم كل معتقل من أصدقائها و تاريخ اعتقاله, كانت تصنعها باتقان و حب و صدق, في كل يوم كانت تضيف طائراً جديداً … “منقوله عن نص الحمله”
بس ليش طائر الكركي بالتحديد؟لأن طائر الكركي الورقي من أشهر الأشكال انتشاراً وبيدل على السلام, والاسطورة اليابانية بتقول بأنو لو صنعت 1000 حبة من طائر السلام /الكركي/ راح تتحقق أمنيتك
وبما إنو كانت هيه بتحب هالطائر فإجت فكرة الحمله.
الحمله راح يكون أساسها صناعة 990 طائر ورقي-كركي- ونكتب على جناحيه اسماء المعتقلين و تاريخ اعتقالهم , وراح نكتب كلمات بسيطة تعبر عن مطلب الحرية و الإفراج عن جميع المعتقلين….
على أمل أن تتحقق هذه الأسطورة على أيدينا و يتم الإفراج عن صديقتنا
“صانعة طيور السلام”
خصوصي إنو راح يضيفوا الطيور العشره يلي ساويتهون هيه بإيديها للطيور الـ 990 يلي نحنا راح نساويهون ليصير العدد 1000.وياريت من الكل يشاركنا بهالحمله، ويساهم معنا بإضافة إسماء جديده لمعتقلين ما حدا سمع عنهون قبل هيك،لأنهون كتير كتار.
https://www.facebook.com/
الفل يبدأ من دمشق بياضُه … وبعطرها تتطيب الأطياب
والماء يبدأ من دمشق فحيثما … أسندت رأسك جدول ينساب
والحب يبدأ من دمشق فأهلنا … عبدوا الجمال وذوبوه وذابوا
والخيل تبدأ من دمشق مسارها … وتشد للفتح الكبير ركاب
والدهر يبدأ من دمشق وعندها … تبقى اللغات وتحفظ الأنساب
ودمشق تعطي للعروبة شكلها … وبأرضها تتشكل الأحقاب
ماذا أقول ؟ فمي يفتش عن فمي … والمفردات حجارة وتراب
