فراس
(1) المعمرجية (1)
– ليلى كيفك؟
– ليلى: الحمدلله, الف الحمدلله، بس ما انتبهت فورا, محطوط على الصامت
– طمنيني شو الوضع؟ شو اللي صار؟
– ليلى: اللي صار قصف طيران، قذيفتين نزلو. وانا كنت بالمرسم يللي مقابل الدوار مباشرة.. مطرح ما نزلت اول وحدة
– الله حماكن. طيران أكيد؟
– ليلى: الف الحمدلله. ما صرلي شي.. بسيط بس..
طب اذا سمعنا صوت الطيارة كلياتنا، وبعدين قربت كتير، و بعدين شي من السما نزل ابيض، بعدين صار احمر، و حفرة كبيييييييييييرة قدام العمارة، و السيارات عمتحترق، و احترقت الكلية فينا كمان، و الصوت كان رهيييييب كتير.. في وحدة صار ينزل من دانا دم من قد مو قوي، و في كتير ناس انأذو .. الله يلطف فيون
انا الفهيمة, جنب الشباك قاعدة.. من شان ارسم مع اضاءة اكتر، نزل البلور و المنجور كللو فوقي، كتير شي رهيب.. الله حمانا، الف الحمدلله
(2) الدكتور
– دكتور طمني. كيفك؟
– الدكتور: انا منيح ومعافى وماكان علي خطر. بس الوضع كان بشع وسيء ولا انساني ومتوحش
– اي الحمدلله عسلامتك. يلعن ………..
حكيت مع رفقاتي كانوا جوا. آكلوها رعبة نظامية
– الدكتور: ماطبيعي نا كنت بمقصف الطب، نظامي هز البلور هز قوي مع بعد المسافة بقا تخيل، ياي يا فراس كان في ولاد وشباب محروقين مشويين
– …………………………..
– الدكتور: اول شي شفتو كانت طفل محروق، وريحتو معبية الدنيا وعم يبكي ويصيح، من وقت وصلت لهلق عمببكي
– طول بالك دكتور ………..
– الدكتور: مابعرف بس يمكن مابقا الواحد بيقدر يرجع من قبل هيك شغلة
– ما في شي ينقال …
– الدكتور: والله مافي. الشباب بالجراحة ما قصروا. بس المشفى ما عندو قدرات. تخيل سكرتيرات الاقسام نزلو يساعدو
يعني الي شغتلو بس يدقو قرارات وكتب ع الكومبيوتر. بس المشكلة مو بالناس المعدات الوضع الغرف كلو مابكفي
– الله يقويكن … شو بدكن تعملوا
– الدكتور: ولا شي متل الجدبان. محكومين بنقص الخبرة بالكوارث. والعترة ع الجراحين. نحن نعلق سيرومات وبس
– اااااااااخ بس. يلعن إنسانيتنا
أنا رفيقي هون خبرني، كان مرعوب، بيت أهلو قدام الميكانيك، بلور بيتن تكسر، وأختو أكلتها رعبة
– الدكتور: يا حرام شو يلي صار. الرعب. لك الصوت. الضغط. ولي ولي. الصور بتفزع
– يا حرام. يا حرام. وآخرتا يا دكتور؟
– الدكتور: يا زلمة بتاريخ الدنيا مافي هيك طناش. تقول ليموت اخر واحد. لا اليوم كانت بداية جديدة. شي بعمرو ما
نشاف
(3) المتطوعة
– دينا طمنيني كيفكن؟
– دينا: مالي منيحة فراس مالي منيحة. ابدا. حيوانات حيوانات
– حقك
– دينا: بس جاوبني ليش ,, ليش ؟
– لأنن أوباش إشو ليش
– دينا: بيتي قريب من التفجير
– بعرف … الحمدلله عسلامتكن
– دينا: فراس مالي قدرانة أحكي ,, تعبانة كتير
– خلص لا تتعبي حالك. أنا بس كنت رايد أتطمن
– دينا: الدمار والعالم المتلوعة والاشلاء والدم
– منحكي بعدين ولا يهمك. والله فهمان عليكي وحاسس فيكي
– دينا: في شهيد من المتطوعين، من جمعية من أهل الخير
– الله يرحمو …
– دينا: أجت أم من الوحدة التاسعة تقلي بنتي والله ابني بردان وما بقدر أدخل أجيب حرام أغطيه
الغرفة اللي عملنا فيها سبر معلومات للنازحين قلبت مشفى ميداني
ضربوا المتطوعين بالمدينة الجامعية أبر مهدئة
مجزرة مجزرة .. اللي صار مجزرة .. ميتين واحد بين جريح ومستشهد
اسفة فراس، بس اليوم شفت مناظر، الحكي مو متل الشوف، انهرت بالشارع وبنات ما بعرفون قعدوني على حيط الجامعة وصاروا يهدوني .. الشباب المتطوعين بالمدينة منهارين كتييير منهارين
– دينا أنا بخجل أحكي أي كلمة. أي كلام ما إلو أي معنى قدام الشي اللي شفتوه
– دينا: تعبنا كتير
في بنت مقعدة وأبوا جنبا كمان مقعد، صفيو بالشارع بدون حرامات، عم يستنوا فرج ربن
الدم والجثث .. بدي أموت ما عاد بدي أعيش
حيسة إنو حرام اعيش
فراس
ليش ؟
ليش ليقتل ويدمر
محرز الكرسي كل هاد ؟
ليش الناس تنذل وتموت وتركض ورا ولادا بالمشافي
عديت من قدام مشفى الجامعة صاروا يقلولن لا تجيبوا حدى كمان المشفى اتملى
أنا صغييييييييرة جنيب اللي عم يصير
اللي عم يصير أكبر مني
20 جثة متفحمة، محروقة جوات السيارة اجوا ديطالعوها، تفرط بين ايديهون
اللي شفتو اليوم بعمري مارح انساه
وقفت قدام الدمار ما عدت قدرانة أبكي وماعدت قدرانة أحكي ولا كلمة
أنا وانت خريجين هالجامعة .. عظيمة كتير هالجامعة .. أحكيلون للأجانب .. قلن عن جامعتنا
قلن نحن مالنا متطورين بالعلم متلكون
بس نحن منقدم اللي أنتو ما بتقدموه
يااارب .. كل شي بدي ياه إنو هالطيبين يلاقوا بلد يعيشوا فيه بكرامة .. بس .. والله أنا ما بدي أكتر
والطيبين بهالبلد كتار
فراس أنا كل يوم الصبح بعدي من هاد الشارع وانا رايحة ع شغلي وأنا راجعة منو
لو تعرف شأد في ناس بتعدي منو .. لو تشوف الطلاب وهنن رايحين ع جامعاتون الصبح
اللي صار مجزرة .. اللي صار مقصود .. هاد الشارع ملياااااااااااااااااااااااااااان مليان عالم وطلاب وناس
اللي صار مجزرة
وهلأ كتير زحمة وبهيك توقيت .. الساعة وحدة .. موعد المظاهرات السلمية هديك السنة متل هالأيام
كل يوم تطلع مظاهرة عالوحدة بتتذكر !!!
– اي بعرف .. كيف ما بتذكر .. وكأنن عم يقولوا للطلاب ديروا بالكن من أولها .. مظاهرات ما بدنا
(4) كريم المغترب
– كريم: استشهدت جارتنا فراس …جارتنا الانسانة الرائعة … اللي متل امي وربيان ببيتها عشرين سنة … رح موت رح طق ….
– الله يرحما ………..
– كريم: كانت عم تسوق سيارتها جنب الجامعة لما بلش القصف
** اخته لهل مجرم .. الله لايسامحه .. اااااااااااااخخخ
انشالله ماحدا صرله شي من صحابك بالجامعة؟؟؟
– جنيت وقت اللي سمعت بالخبر .. لهلأ ما وصلني شي .. اللي بعرفن اتطمنت عليهن .. بس خيو في 70 بني آدم ماتوا
– يلعن كل شي يا كرمو .. رايح أجن .. رايح أنفلج
– كريم: اخ يا فراس … اخ من كل قلبي …كل شي عم ينهار ويخرب .. والناس عم تموت
– أكتر من شخص عم يبكي هو وعم يحكي معي .. رفيقي طبيب بمشفى الجامعة شاف العجب .. رفيقتي بيتا بالفرقان رايحة تجن .. رفقاتي اللي كانوا بالعمارة
– كريم: اخ يالله دخيلك … شو هل وحوش!!
(5) المعمرجية (2)
– ليليان كيفك؟
– ليليان: هلا فراس .. جسديا ما فيني شي نفسيا بدي طق
– والله أنا رح أنفجر .. صرلي 10 ساعات ما تحركت من محلي .. انتي كنتي هونيك؟
– ليليان: عنجد فراس شي بيقتل المناظر يلي شفتها اليوم رفقاتي يلي انجرحوا قدامي و سمعنا صوت الطيارة و في 3 من رفقاتي كانو برا شافوها بعيونون عبتقصف و لسا بيستجحشونا
كنت بالكلية يعني ما بعرف شو حظي أني كنت بالحمام فما صرلي شي !! نحن كليتنا كلها بلور الممرات و المراسم كلو شبابيك كبار مشان الإضاءة كلو طار عالطلاب
شي غريب عنجد توحش مالو مثيل و فوقها استجحاشششش و شعب يعني غبي و ذليل مو معقول
المدينة الجامعية يا حرام يا حرام الله يعين العالم
لك اخخخخ ذاتي بدي طق ما عبقدر أحكي عنجد
أنا ما كنت متوقعة يكون حدا من الطلاب مات بس يلي كانوا برا في منون ماتوا
– كنت عم أحكي مع الدكتور يا حرام قديش متأثر .. شاف العجب
– ليليان: الله يكون بعونو عنجد .. رفقاتنا يلي ساعدوا بالإسعاف كلون متأزمين ..
فراس كلها ولاد و ناس سوق هونيك كلو و اليوم شمس و الساعة 1 يعني عجقة بشكل
– بعرف، دينا بيتها هونيك ويا حرام كانت عم تحكي معي منهارة تماماً
– ليليان: ما بعرف ما بعرف .. من وقت ما رجعت عالبيت و أنا عببكي .. شي بقطع جوا القلب فوق ما ناس نازحة و فقيرة و عايفة يلي خلقها وين بروحوا بحالون هلأ ؟ لك مو حرام إجرام إجرام مالو مثيل
بس بدي افهم ليش ليش
يعني عنجد حاج حااااج الناس ساكتة هي يلي عبتخلي يركبها بهالطريقة يعني عبكذب عيونا و أدانينا كمان و لسا هو بيطلع الصادق ناس ماتت ماتت
ما في نتيجة مافي ما فيك توقف بوجه هيك توحش كم واحد ما بيعملوا شي و الناس خايفة و طفرانة و حقها
ايه و شو الحل ؟
ما في حل عنجد .. هلأ نص الطلاب بدون يسافروا و خلص .. و البالقي عايشين حسبون الله
– طبعاً، مين بئا يبعت ابنو عالجامعة ..
وانتوا ديروا بالكن كتير .. ما بعرف شو بدي قلك، والله كل الكلام سخيف وتافه .. خراي على عيشتنا
– ليليان: خراي على بشار و نظامو و علينا لأنو لساتنا ما صرنا كلنا بالشوارع !! بدو يقتل 3 ملايين بني آدم خلي يقتل لأشوف عالقليلة بموت بشرفي أحسنلي من موتة بطيرانو على غفلة
فراس حاج حاج يعني لإيمت بدنا نخاف على حالنا و نبقى ساكتين والله أنا عبموت هيك
– صدقيني حاسس فيكي مليون بالمية .. اليوم علقت مع أهلي على نفس القصة .. هنن بدن ياني أسكت .. وأنا كنت رح أنفجر
– ليليان: أنا أهلي نفس الشي شي بيقتل
– معلش طولي بالك وروقي …بعرف إنو صعب … بس هادا اللي منقدر عليه حاليا … ونحن مو ساكتين …
– ليليان: منطول .. بيجي يوم منحكي فيه بيجي لإيمت يعني بدو يبقى ؟
– لو دامت لغيرو ما كانت وصلتلو .. بئا رح يجي رح يجي
– ليليان: فراس هلأ عبشوف صور من عنا بالكلية يلي ماتو .. آخخخخ يا ربي
